Pilotazaleek asteburu bizia dute aitzinetik. Ostiral arratsalde honetan jokatuko da berezkoen pilotako txapelketako lehen finalerdia Angeluko Haitz Pean trinketean, 20:00etatik goiti. Bi bikote indartsu neurtuko dira: Iker Espinal eta Luis Sanchez nafarrak alde batetik, eta Maxime Etxeberri eta Battitta Ducassou bestetik. Paperean, norgehiagoka orekatua espero da, nahiz eta Angeluko kantxaren ezaugarriek Espinal eta Sanchezen aldeko joera izan dezaketen, kantxa bizia baita.

Multzoetan, Maxime Etxeberri eta Ducassouk partida bat irabazi eta bat galdu zuten: lehen neurketan Bideondo eta Saint Paul garaitu zituzten, baina Ospital eta Gixandut faboritoen aurka 40-33 galdu zuten. Hala ere, joan den astean Lafitte eta Orhategara garaituz finalerdietara sailkatu dira. Ducassouk adierazi du elementu batek aldea eragin dezakeela partida honetan.

Espinal eta Sanchezek, berriz, partida bat gutxiago jokatu dute; multzoetako bat irabazi zuten jokatu gabe, Darmendrailen oporraren ondorioz. Espinalek onartu du Ducassouk egindako iruzkina: «txapelketaren bilakaera xeheki aztertu behar da». Bi bikoteetako gibelariak –Sanchez eta Ducassou– oso azkarrak dira, eta aitzinekoak –Espinal eta Etxeberri– finak. Hori ikusita, joko maila eta konfiantzak erabakiko du nork hartuko duen finalerako txartela.

Aitzin partida 19:00etan hasiko da, A mailako amaturren buruz buruko lehen finalerdiarekin: Sarako Betti Gurrutxaga eta Atzarriko Mikael Massonde ariko dira. Bigarren finalerdia igandean jokatuko da Hazparneko Berria trinketean, 16:00etan: Irisarriko Julien Etxegarai eta Zaharrer Segiko Xabi Alkasena neurtuko dira. Ondotik, berezkoen beste finalerdia: Ospital – Gixandut / Pierre Etxeberri – Iphar.