Azaroan hautatua izan bazen ere, urtarril hondarrean hartu zuen bere kargua Joxe Ramon Bengoetxea, Euskal Herriko Unibertsitateko EHUko errektore berriak. Irunen sortua bada ere, Gasteizen bizi da gaur egun, eta Bilbo, Donostia eta Gasteiz artean ibilki da, eguna joan, eguna etorri.

EHUk berrogeita bat mila ikasle ditu, bost mila irakasle eta hiru mila langile, Bilbo, Leioa, Gasteiz, Donostia eta Eibarren dituen campusetan banatuak.

Gure Unibertsitatea Euskal Herriko unibertsitatea da gogoz eta bokazioz. Guk euskara duten lurralde guztiekin harremanak sendotu eta areagotu nahi ditugu, gure asmoa baita Euskadik Euskal Herrira jausi egitea

EHUko ateak irekiak dituztela Ipar Euskal Herriko ikasleek, nabarmendu nahi izan du errektore berriak, baina jabetzen da bereizkuntza bat jasaten dutela baxoaren nota apaltzen baitzaie baliokidetzea egiterakoan. Oztopo hau gainditzeko nahikeria badutela dio, baina eskuduntzak Madrileko gobernuaren gain direla gehitzen du Bengoetxeak, eta borondate politikoa behar dela.

Ez dute baztertzen Ipar Euskal Herrian proiekturen bat abiatzea, tokiko erakundeekin eta akademiarekin elkarlanean, beti ere.